生日免費遊海洋公園

這麼多年都沒有享用過海洋公園的生日正日免費優惠，因為正日一般都不會去海洋公園:P。今年八月居然有八月生日任何一日入場優惠，我和珠生都是八月之星，於是便計劃去一趟「生態之旅」。

選了星期日，起初怕很多人很瘋狂，而且問了幾個朋友都不去，想打退堂鼓，幸好最後堅持去，雖然辛苦，但玩得好開心。

去到金鐘，已經體驗到海洋公園和巴士公司的安排周到，4條隊一齊上車，巴士一架接一架，根本不用等已可以立刻上車開車出發。

我們10:30到達，本來諗住9:00到達等開門，不過帶住LITTLE L，根本是幻想，哈哈。門口買飛排左一陣，但好多窗口都算好快。職員友善祝你生日快樂，另外，生日仲有兩張生日優惠券，可以在園內買東西或食物有8折，都幾好用架! 抵讚!

睇了地圖時間表，第一場海洋劇場11:30，二話不說立刻上山去霸個靚位，先試海洋列車，其實我這幾年經常來海洋公園，不過全部因公事，都無玩過，但海洋列車都叫坐過。這個位又要讚下海洋公園，推住BB車是可以上優先卡的，照顧好周到。

去到海洋劇場先換片:P，霸個中間靚位睇表演，正正式式坐低都已經11點幾，SELFISE一下、睇下熒幕的片段、玩下互動遊戲都好快開場。

我們的位置都好「正」架，對正中間。

這個小朋友睇到好認真，係咁叫D海豚做「魚」=.=，不過佢應該真心好鍾意D「魚」，經常手指指，人地拍手佢又拍手，睇得好開心。

睇完表演，PAPA話食飯，我見時間尚早，所以建議先去睇多一個館才食飯，於是繼續睇「魚」，去左附近的鯊魚館，LITTLE L直情唔想走。

不過，睇完鯊魚才搵位食飯，開始後悔，因為我們想坐得舒服D，入了幾間餐廳都人山人海，而LITTLE L居然瞓著了>.<，只好折返海洋劇場後面那一排枱椅，我們買了一些小食開餐，有8折YEAH! 而LITTLE L瞓了一會醒了就午飯。

之後，PAPA話好熱，一定要去北極館睇企鵝，哈哈，北極館真的好凍，LITTLE L要添衣才進去，但D企鵝真係好得意，尤其游水時。

睇完企鵝本來想落山，但經過熱帶森林館，於是入去行下。點知又係睇魚最有興趣，因為熱帶森林好多好恐怖的東東，包括下圖的曱甴箱……我望一眼都「毛管棟」，但兩父子睇得好入神。

上山搭海洋列車，落山當然要搭纜車，盲中中走左去輪椅專用入口，好彩職員又好友善俾我們入，海洋公園的員工真的好抵讚。

這個小朋友坐纜車好開心，不過後段「震震下」佢有少少驚要我抱左一陣。

最後一站熊貓館，其實我們都有經過香港老大街，但無咩野玩所以無影相。

有兩個熊貓館，一個安安佳佳位，一個樂樂盈盈住。一心想探安安佳佳，因為牠們才有今次免費入場優惠，點知牠們休息緊，幸好都見到樂樂盈盈。

這個小朋友見到樂樂盈盈，指住叫「汪汪」=.=，回家之後6299和平台的婆婆問佢去海洋公園好唔好玩/有咩睇，佢都答人地「汪汪」……他可以講出「熊貓」這個詞語，但佢見親四腳爬爬的動物都叫「汪汪」先，我懷疑佢應該以為「汪汪」是四腳爬爬的動物代號，哈哈。

每次入店，佢都拎野玩，問親佢係咪想要，佢就即刻放低(乖:P)， 好彩仲未識LUR你買野。

最後離開海洋公園約4點幾，帶住小朋友，唔預玩太夜了。

總結這次海洋公園之旅實在十分開心，另外，對海洋公園的交通安排、人流管制和配套設施都好高評價，我們全日基本上無咩排過隊，順利睇晒想睇的動物和表演，唯一入不到餐廳食飯，但都好滿足了。

當然，如果可以星期一至五來玩，又或入秋後才來，會再好一點，因為今日33度，都真係幾辛苦下。另外，如果小朋友大小小或有準備，可以玩「夏水禮」，不過我們擔心濕身好多預備，太懶所以無玩。