摘士多啤梨

 聖誕節去了錦田鄉村俱樂部BBQ及摘士多啤梨。

舊年都摘過一次，經驗好好，士多啤梨好好味好大粒，Little L是非常喜歡吃士多啤梨的，所以今年又去，同一地點，今次仲約埋朋友仔一齊任食BBQ，玩足大半日。可惜，前兩日落過雨，士多啤梨濕過水，好易爛，只能即食，帶回家過夜的都爛左好多，有點失望。

 

其實睇落都好大粒好新鮮，不過落過雨原來係唔擺得……

 

除了摘士多啤梨，仲有好多野玩，不過全部「燒銀紙」，哈哈。

 

最好還是餵魚、餵羊、餵兔仔等，比較「化算」。

大B新的開始+K1 INTERVIEW 回顧

我知這裡已發霉，不知是否仲有無人來望下﹖哈哈。

轉眼之間，LITTLE L已經讀完K1，學校返到6月尾，7月就放暑假，這一年，校園生活相當愉快，他也進步了很多，回家會告訴我做了甚麼、和甚麼同學玩，感覺他長大了不少。

然而，我一直想他做大B，經過一年的觀察和班主任的意見：他的大小肌發展還算可以，學習能力亦不慢，唯性格較慢熱謹慎。我很同意老師所講，他實在很慢熱，為了想他建立更好的自信，所以最後還是決定讓他做大B，REPEAT K1，不捨地離開原來的學校。相信我會很不習慣，那條由地鐵站走往學校的路，手牽手走了年半，懷念母子一起上學，在公園吃麵包、看巴士車身廣告的日子，轉了學校，應該無法再揍返學了!

當然，要REPEAT K1，INTERVIEW早在去年年尾已完成，今年目標明確，只考龍校，為了減少升小壓力，因為我覺得這些選校遊戲很難玩。當時心諗，考不到就在原校升K2，反正沒有壓力。

1.      九龍塘龍幼

去年有IN過WAITING，今年再接再厲，這是心目中的頭兩位。GROUP INTERVIEW內容毫不困難，其實不太清楚學校如何評分。

RESULT: AM OFFER，掙扎了一會，因為幼稚園部出名有愛心，小學部是非常出名的，可是升小比率只有大約一半，而且中學部不算是我們心水，所以放棄。

2.      九龍城龍幼

去年有IN過WAITING，今年又是再接再厲，這是我們心目中的首選。INDIVIDUAL INTERVIEW會隨機分配廣東話或英文老師，我很感恩LITTLE L返了學，即便抽中外籍老師，都能以英文回答所有問題。而很明顯，他是特別喜歡這間學校，面試當天心情是特別好的:P。

RESULT: AM OFFER，收到OFFER的那天，開心到暈，開心過自己當年大學放榜，你是父母自然明白這種心情。更巧合的是，新居就在學校附近，我們毫不猶豫的接受了這個OFFER，以後返學非常近。

3.      九龍城龍幼

這是復辦的幼稚園，不過，中學部是女校，好攪笑為何我會報名﹖因為當時剛搬了屋，發現幼稚園會開在新居附近，而且幼稚園和小學部都是男女校，如果考不到1和2，其實都是一個選擇。INDIVIDUAL INTERVIEW，考齊中和英文，內容不算難，LITTLE L也可以做足。

RESULT: AM OFFER，中學部是女校，我都無理由留低，哈哈，毫不猶豫的放棄了。

4.      九龍塘津貼幼稚園

這間不是龍校，為甚麼會報﹖事緣我很HEA，一些出名的龍校要求太過分，例如要平日請假交表，我是絕不會考慮的，收男仔的龍校已不多，故此，報得太少，BABA忽然有日問我會否報多一兩間讓LITTLE L練習一下(-.-!)，我太懶，當時就只剩這間出名的幼稚園未截止，那便報名。不過，最攪笑的是這間最遲先有得IN，上面3間龍校IN完才到這間。INDIVIDUAL INTERVIEW，不算難，考小朋友亦會問家長，容許父母一齊IN。

RESULT: WAITING，可能當天搬家，BABA沒有出現，也可能因為問我會否考慮下午班但我一口拒絕，哈哈，總之沒有OFFER。

 

其實，我好怕幫人做決定，還要幫自己的兒子做決定，有時都好怕為他選錯，不過，衷心希望他會努力向前走，而我，亦會一直牽着你的手勇往直前。

31M

今個月經歷的事都算豐富，包括N班畢業和去旅行，新加坡之旅已經另篇詳記了，在此略過。

N班結業

N班上學，是LITTLE L人生第一次離開父母學習過群體生活，六個月的校園生活，見到他很大的進步，也很感恩學校上下，校長、老師、嬸嬸和同學都對他好好。之前提及，他也有在校門鬧情緒和扭計的時候，不過這個年紀既開始有自己想法又未完全懂得表達自己，許多時大人都未必真正了解他們的想法，唯有耐性的開解和用心的接受。

學期終結，學校沒有結業禮，只有一個結業表演，上學日的其中一小時，邀請家長一同參與。一直以為這次表演會像上次學校開放日那麼「攪笑」，原來並不是，當天的一切都很認真，而小朋友的表現完全勝預期。望著自己的孩子在台上又唱又跳，有規有矩的聽老師指示，真的令台下的父母有種莫名的感動。

學期完結，學校派回所有課堂習作，另外加上一隻課堂照片的光碟，光碟內的相片是每個同學不一樣的，可見老師的心思。我不知道其他學校是否都一樣用心，但就很滿意學校對每個小朋友的心思。

衷心感謝學校給予他的愛與關懷。

訓練獨立

LITTLE L的BB床是TROLL NICOLE MINI，寫住可以瞓到3歲，但過左2歲都已經好勉強，可能佢算高大，最近一個月的某一天，終於拆左，因為真係瞓唔到。拆左張BB床，唯有迫佢瞓自己間房，未出世前已訂了一張子母單人床。我有參考其他媽媽，幫他佈置一下睡房，已經換了THOMAS床單被鋪，也在牆上貼上他生日時用的飛機司FOAMBOARD，小書桌亦已搬進他的房間，希望打造他的小天地。

不過，他完全無法自己單獨睡，即使我已在子母床下層陪伴，他反而比之前睡BB床時更痴身，有晚我半夜醒了睡不著，出了廳玩下電話，怎料他一會醒了，喊得很厲害，自己爬下床又跌親，好可憐咁! 不知是否年紀太小，還是心態未READY。

我沒有過早迫他獨立自己睡，因為我不太相信「痴身」變成習慣的理論(身邊太多例子都正反論證過「痴身」跟性格有關，哈哈，我信架!)，反而是實際環境不許可，提早拆了BB床，現在擔心他未READY迫他自己瞓會有反效果，而我唯有辛苦D繼續陪他瞓子母床。

大家有沒有其他好建議﹖

2歲半小總結

已經2.5歲，媽媽最近愛烘焙，整左個靚靚蛋糕俾LITTLE L，賣相很靚架，不過始終都係甜，只俾左少少佢食。

 身高體重

無度身高，學校5月初度過91CM，而家估計93CM左右，體重估計大約28磅，因為5月病左一輪，重得慢左。

返學頭幾個月真係成日病，都唔知關唔關返學事，不過踏入六月就好D，六月返足成個月學，終於覺得D學費抵D。

 

語言發展

我暫時沒有太擔心他的語言能力，最近還覺得他「口水多過茶」，哈哈。班主任話佢語言發展不錯，句子表達進展很不俗，不過只限中文，外籍班主任雖然都讚佢好大進步，不過話佢始終唔敢用英文表達自己。都係果句，佢一向講開廣東話，好難迫佢講英文，而我的方針一向都係學好母語才發展其他語言不遲，就由得佢。

最近跟幾個教英文的舊同事講開，他們都同意先學好母語，同時不要忽略英文，現階段8:2比例最適合。

肢體發展

因為學校偏細，估計活動空間不大，這是學校的唯一缺點。故此，99每天放學後都會帶他到平台跑跑跳跳、踢波踏單車等，基本上都似一般男仔，好鍾意跑跑跳跳，學校有課外收費的田徑班、游泳班可參加，不過年齡未夠沒有報名，打算明年才讓他正式學游水。

班主任有同我傾過，覺得LITTLE L大肌肉比小肌肉發展得好D，睇番D課堂習作就睇得出，班主任建議我們加強訓練他的小手肌肉，我懶，沒有特別研究，雖然九月升K1，但我唔排除今年再報心儀學校的K1，明年都有機會做大B，所以唔急住訓練他的手仔要佢寫字。

 

佢好鍾意執筆畫野：

 

LITTLE L開始用學習筷子幾個月，進度算理想，不過唔知係咪小手肌未夠靈活，未能做到V字手勢，佢個V字手勢係好攪笑。

情感個性

越大越怕陌生，開始覺得佢份人內向謹慎，在外表現很文靜，在家當然係另一個樣啦。

班主任讚佢好受教，話佢之後佢一定聽話。暫時我都同意，雖然TROUBLE 2有時的確令你好火，不過，這個寶寶都算話得聽，暫時唔算惡教(唔好小器)。有次唔知做錯咩俾我罰無得睇THOMAS，佢都唔會扭，知衰地在自己睇書。

情感開始豐富，開始有同理心，同佢講白雪公主講到公主食毒蘋果死左，佢會跟住流淚喊。另外，性格都算爽快，話完罰完、朋友仔搶佢野等唔會記仇，好快FRIEND番。

生活習慣

作息定時，即使不用返學都仍然7點多起床，另外，下午還是需要午睡，好彩九月原校升K1都係上午班。

之前提及已戒片，一切都順利，全天候不用著片了。有時見佢夜晚飲得多水，我們就迫佢著片瞓，不過佢有時都唔肯。

佢知道瞓前一定要刷牙，每晚一定會提我們，但依靠我幫佢刷牙，唔多願自己動手，好奇怪。

 

好似好大個啦：

 對水鞋我係日本樂天訂，係咪好靚呢﹖

Thomas and his friend

29個月成長日誌

BB睇中醫
今個月無停咁病和睇醫生，其實起始只是傷風咳+痰+少少鼻水，但一直咳唔停，前前後後成個月，西醫睇左3次，中醫睇左2次，係，我們同佢睇過中醫，好多朋友聽到都好大反應，一係覺得睇中醫信唔過、一係覺得D藥好苦BB唔肯食。

開頭係睇西醫，食左2次抗生素，我實在很反感，最大問題係好唔番，諗諗下自己如果咳，一定睇中醫或湯水療法，從來未試過西醫攪得掂，再加上抗生素我覺得仲毒過D中藥。於是搏一搏，有明顯好轉，不過最衰係BABA無端端又病，惹番佢……另外，LITTLE L堅勁，應該唔係好怕苦，氹下佢係可以食晒D中藥。

終於，去到五月尾，LITTLE L先正式好番晒，唉……

戒片

基本上已成功戒片了，上個月提及學校幫忙，我們在家配合，今個月已經可以全天候不用著片了，自己WEE和POO，包括瞓覺和出街，佢都唔肯著，我們還將家中的三包MERRIES 大碼存貨賣了給他的朋友仔，哈哈。不過，都有試過失手，主要是瞓覺，這個月係咁病，臨瞓前食藥飲水，有試過瞓覺尿濕張床，好彩有張床墊。

成件事比想像中容易，都係果句，感謝學校幫忙。

是日走水貨，將D尿片賣俾人，哈哈。

對比概念

某一日我發現，LITTLE L都識/了解好多對比概念，凍冰冰VS熱辣辣、多VS少、大VS細、內VS外(這個學校教，因為見到佢係學校的工作紙)、長(頭髮)VS短(頭髮)、高VS矮、肥VS瘦、上VS下、光VS黑、濕VS乾、餓VS飽等，我記得咁多。

瘋狂愛上THOMAS

這一日終於來臨……現在甚麼都是THOMAS，我之前幫佢用心打造的不同形象全部無影，而家D出街衫、鞋、底衫等，唔係車仔就係THOMAS……-.-

我將BB時個米袋改裝成攬枕，哈哈。

 

學校活動

學校旅行日，目的地是元朗有機農莊，天氣悶熱，但玩得好開心。

學校開放日，邀請學生回去表演，不過LITTLE L病足成個星期，臨表演前一日都病假無返，當然無綵排過，但學校都無話唔俾佢表演，結果表演當日當然成舊飯唔知做咩，好攪笑。而學校的開放日，亦令我覺得好有人性，個個小朋友都玩得好開心。

 

不知是不是TROUBLE 2進階，最近返學無之前咁乖，每日係學校門口一定扭，死抱住我唔放，要老師抱上課室，同班主任傾過幾次，佢上到課室即刻無事，正確D講係上樓梯轉角已經收聲，好明顯係喊俾我睇……-.- 而就我們觀察，他在學校應該無發生咩事，估計只是鬧情緒，有無媽媽有相似經驗可以分享﹖

 

 

BABA堅持他在音樂中成長，所以返了N班還有繼續上PLAYGROUP，又一期畢業了。

 

27及28個月成長日誌

第一次失手，要2篇一齊寫，希望之後唔好: P

身高體重
學校又幫佢度高磅重，90CM和28.5磅，就快要買小童車票了>.<

出牙
下排2隻大牙出齊，上排唔覺，而且無流口水，可能暫時未出。

語言能力
放完新年假，老師打電話來同我傾左幾次，話佢過完年成個人好多野講，之前以為佢未識講野(>.<)，我估佢開始熟習學校環境，而的確，佢現在以句子表達的能力高了很多，已經好能表達自己了，連無聊的語句都講到，例如爸爸教佢一次：「稱尋磨交叉燒包，老鼠唔食漢堡包」，佢已經即刻識講了，現在仲成日跟我們玩包剪泵。

另一驚喜是英文進步好大，這完全歸功於學校，我們一家一向以廣東話溝通，亦沒有刻意教英文，新年前的家長日，外籍班主任話佢上堂唔講野，無計啦，佢都唔識講英文，哈哈。不過，又係新年後，外籍班主任話佢上堂識講野，其實我也好有興趣聽佢講英文，因為我真係未聽過:P 多謝學校，這間學校真的好好，愉快學習，但無知不覺間學識好多野，現在佢識MONDAY 到 SUNDAY、 ONE到 TEN、不同顏色、動物、眼耳口鼻和身體不同部分的英文等，識唱成首英文歌，三月份的INTERVIEW遇到外籍老師見佢都聽得明。或者好多BB英文都好叻，不過LITTLE L一向講和聽都係廣東話，所以我覺得佢好大進步。

戒片
學校新年前主動提出幫佢戒片，話佢係學校好READY，成為班上第一批戒片的先頭部隊，就住這件事，同班同學媽媽WHATSAPP GROUP討論過，結論係不可以一齊戒，因為一齊瀨好大鑊……笑死!

學校教得好好，話佢好叻，係學校戒左一個月左右，打電話俾我話放學都唔會再幫佢著番片，我們非常驚慌(如果搭車急點算好先﹖)，因為我們仲懶懶閒，諗住熱D先在家開始，既然迫到埋身，所以都開始在家配合，因為有學校的協助，成件事比想像中容易D，現在進度良好，只係出耐D街和瞓覺迫佢著，其餘時間佢都自己叫WEEWEE和POOPOO了。

飲食
出沖繩前同幾個1213 BB聚會，見到2個朋友仔開始用筷子，我們在沖繩見到THOMAS筷子就買俾佢，可能D學習筷子幾易用，佢現在出街跟我們食都會用下筷子，不過在家99嫌佢用筷子慢>.<，反而唔俾佢用。

老師打過來讚佢食野好快，唔偏食，學校提供的小食以健康麵包餅乾為主，話佢連D好多小朋友都吐番出來的五穀包都食清光……WELL，我其實唔知點回應，因為真係幾好笑，佢太為食。

學校生活
好開心愉快，佢好明顯鍾意返學，不時唱歌，也會提下學校的同學叫咩名。學校新開，感覺是愉快學習的路線，也會不時主動跟家長聯絡，講下小朋友在學校的情況，有時我的同事聽到我和班主任講電話，都覺得學校有心。

能夠愉快地成長，學校也注重自理和閱讀，語言環境又不錯，當日無心插柳插班N，相信我好大機會讓他在此繼續升K，一心想讓他做大B的我，其他種種原因，加上學校令我好有信心，我應該會讓LITTLE L九月升K1。: ]

他能健康快樂地成長，不正是我一直的心願嗎﹖

你睇佢拆利是個樣都認真過人，唔知思考緊咩咁。

最近愛上拼圖，已經可以自己砌了，有時仲要唔俾你幫手，拼圖有助訓練專注力，不錯。

一家十幾口一齊去左迪士尼，不過那天天氣不好，無咩影相，佢同表哥玩得好開心。

全文無提TROUBLE 2，哈哈，唯有以圖為證有幾TROUBLE：

HAPPY 28M，媽媽整左羊架俾你食，你睇佢幾為食，大啖大啖咬：

26M成長日誌及農曆新年

這篇真係遲大到，因為忙到顛左，有同事忽然調走，又有同事放產假，新年前後我開始一個頂三個，之後接住仲要公司peak season，真係諗起都忙到出煙。

還是正月，跟各blog友講聲猴年進步，寶寶聽教聽話! 今年想做D利是封玩下，不過時間有限，整左少少，入面是HYSTERIC MINI 糖，送俾同事朋友開心下。

新年這個大節日，加上加上LITTLE L返學，學校又有活動，今年新年顯得更特別。

返學大約一個月，開始見到他的進步，說話很多，識唱好幾首歌，禮貎好左。另外，學校很鼓勵閱讀，他現在會很自動的拿書櫃的書來看，我也非常感恩他喜歡上學，也覺得學校很適合他。

睇番手冊，學校原來有幫他度高磅重，88CM和27磅，非常重手，幸好不常扭抱：P。

學校在新年前有個賀年市集活動，正好讓家長參觀一下學校，佈置得很有氣氛，有得玩有得食，也算不錯。第一次正式參觀學校，的確如想像般細，BABA一直覺得學校太細，細路沒有太多走動空間，不過，想深一層，細有細好，當天見到部分沒有任教LITTLE L的老師和一些EE都叫得出他的名字，這也不是壞事。

媽媽最開心的看到課室內的課堂習作和相片，睇到相片中佢上堂有板有眼的活動，那種感覺都幾特別。

賀年節目，不外乎拜年和飲飲食食，媽媽今年忙無蒸年糕，趁表哥仔一家來99家小住一晚，弄了焦糖燉蛋，這個小朋友非常支持。

去左花市行過大運，花市太細，行了一圈就走。

開始大個仔，個人主見越來越強，喜歡不喜歡都要自己話事，有時不知好嬲定好笑，例如鍾意著大人鞋、好鍾意件睡袍要著住出街、有時唔肯坐BB車要自己推、顧住玩唔肯自動自覺食飯等等，原來TROBULE 2現在才正式開始，哈哈。

其中一項非常難攪就係剪髮，BB時是用電動鬚刨攪掂，現在非常反抗，有問過那些坐飛機車仔的髮型屋，要$200-$400，覺得太OVER，試過去樓下的普通髮型屋，未坐低已狂喊，結果剪唔成，一直忍佢好彩冬天，朋友有介紹過粉嶺有間坐飛機車仔的髮型屋$80，本來打算新年後去試下，點知大年初三晚成家人忽然興起話幫佢剪髮，半推半就，IPHONE和IPAD全部出齊先叫做攪掂，唉......

開始出最後四隻大牙，新年前後成日流口水，見到下排右邊那隻已出，左邊那隻出了少少，胃口差左，希望快D出完。

賀年LOOK，一早睇中這件紅色麵包超人褸，點知學校賀年活動建議學生著傳統服飾，我又唔想特別買，咁就著番去年那套，好彩仲合穿。

RAG MART代言人，阿媽我中左RAG MART毒。