新加坡親子遊

LITTLE L學校收十個月學費，即係返埋六月尾放暑假，真令人喜歡。於是，我們一家三口加埋6299便趁未開始加價，即刻來個旅行，今次目的地是新加坡。

準備篇

酒店：Dorsett Singapore Hotel

本來想住聖陶沙，但即使不是最旺季都覺得不便宜，本來諗住近沙灘近海洋館又近環球影城，不過我們後來決定不去環球影城；而且我們要BOOK 2間房，所以太貴都不考慮，結果選了市中心附近的Dorsett Singapore Hotel，貪其方便，在CHINATOWN附近，地鐵站一出就係，本來以為有相連房，原來只不過是打開兩間房中間的門俾你，誤會晒。雖然酒店房唔大，但整體OK，最緊要係方便又有WIFI (聽講聖陶沙好多酒店不連WIFI)，同埋有個免費電話俾你用，出街有咩事可以免費打本地電話。

 

酒店設計都有特色，相機鍵是門鐘：

PORTABLE POTTY

因為戒左片，去旅行都真係驚驚地，因為唔係周圍有廁所，所以我出發前買左3個可摺埋的PORTABLE POTTY，只是咭紙做睇落好兒戲，但寫明承重50磅，暫時一個都未用過，所以不知實際效果。

網上圖片：

 

食水和食物

今次一如以往，都有在機場帶水過新加坡俾LITTLE L飲和沖奶。不過已經大個仔，所以食物一樣全部跟我們吃了，我好HEA，又係無再帶個象印壼。

DAY 1: 機場>酒店>PLAZA SINGAPURA

機程約3.5小時，比去沖繩耐，早機去不是瞓覺時間，當然要俾D野LITTLE L做，有書睇有車仔玩有埋電視，加上佢好鍾意食飛機餐，基本上好乖咁過左成程機。佢唔肯著片，我們其實好驚，3.5小時喎，中間同佢去WEEWEE，但佢話好驚因為飛機始終震震下。

 

機程好順利，比原來時間還早到，到埗立刻根據網友教路，在機場買張電話咭連上網。之後貪方便BOOK架的士去酒店，因為4大1小加3個喼，所以好守規則BOOK了架大的士，都唔平，後來司機叔叔話其實可以坐普通的士都OK，而且我們路程好短，酒店就在地鐵站出口，這個價錢唔抵，後來睇地鐵圖，原來搭地鐵都相當方便，所以回程就選擇地鐵。

酒店放低野，本來無行程 (我今次真係勁HEA : P)，但時間尚早，於是出發去最近的商場PLAZA SINGAPURA，諗住推車仔LITTLE L可以小睡片刻。

PLAZA SINGAPURA基本上是我的天地，哈哈，有GREENGATE有SPOTLIGHT，不過一家大細，我都唔算行得好暢快，想當年2人世界來新加坡，我在SPOTLIGHT不知逛了多久，而今次居然一點收穫都沒有，可能已戒毒(:P)，也因為時間太短了。在小小的GREENGATE買了2個優雅的雪糕杯和一排夾，其他沒有特價就算了。

 

左邊個MACAROON 玻璃樽係CANDY DELICIOUS 買，太得意忍唔住。

FOOD COURT是新加坡的飲食文化之一，所以第一晚就在PLAZA SINGAPURA的FOOD COURT食了晚飯，我當然點了海南雞飯啦。

DAY 2: CHINATOWN天宇旅行社>聖陶沙海洋館>VIVO CITY>榴槤一條街>克拉碼頭夜遊船>松發肉骨茶

網友教路，買門票訂本地團不得不去CHINATOWN天宇旅行社，吃完早餐就去天宇旅行社，買齊咁多日的門票，坦白講，新加坡的門票錢很貴，我們已經沒有去環球影城，但都佔了整個行程的一半駛費，差點攪到後面幾日不夠錢用，哈哈。

搭單軌列車入聖陶沙海洋館，新加坡的海洋館譽為全球最大的海洋館，我們覺得沖繩的海洋館已很厲害，所以對新加坡的海洋館充滿憧憬，結果是非。常。失。望! 新加坡的海洋館應該大過沖繩，亦明顯很用心有不少海洋知識，例如有隻很大的挪亞方舟，又有很多不同國家的海洋歷史，不過海洋館內的陳設和佈置，就不及沖繩的令人震撼和難忘了。再加上，我們兩日後去了RIVER SAFARI，就更覺得這裡令人大失所望。我們的結論是：你要是去過沖繩的海洋館，又或打算去RIVER SAFARI，那就可以省卻不用去海洋館了。

 

聖陶沙有間最大的CANDY DELICIOUS ：

離開海洋館食個LUNCH，本來打算在聖陶沙的沙灘玩一會，怎料日正當午，完全不適合在沙灘玩，只好離開，在VIVO CITY逛了一會，讓LITTLE L可以在冷氣地方舒服的睡午覺。

之後回酒店放下BB車，就往榴槤一條街，BABA一家三口榴槤FANS，當然相當興奮，不過榴槤一條街不是想像中易找，亦不是很密集那種市集全部賣榴槤，所以搵左好耐，最後試了兩間，不過6299話好普通喎!

 

 

買了遊船的票，在克拉碼頭上船，如果以前2人來玩，一定不會參與這些「遊客活動」，不過有老有幼，這種活動其實挺好，不用辛苦。我發覺LITTLE L應該都幾鍾意，因為回香港之後，他都不時提起「克拉碼頭」，成日話自己去遊船見到魚尾獅，好攪笑。

 

松發肉骨茶就在克拉碼頭旁，好像還是總店。松發的肉骨茶真的好吃，之後去過其他食肆，都不能媲美。

 

DAY 3: SINGAPORE FLYER>LEGOLAND

晨早出發往SINGAPORE FLYER，原因是在天宇買LEGOLAND門票，再JOIN埋搭旅遊巴，否則又要麻煩去搵包車服務，在SINGAPORE FLYER底上車，到此一遊算玩了:P。

 

往LEGOLAND的車程，見單張話預2小時，以為好遠，實情是車程不多於45MINS，但在星加坡的海關過境足足等了1小時有多，那種效率是慢到令人無法接受。結果都要差不多3小時到LEGOLAND，回程也是差不多3小時，反而馬來西亞的海關好正常，只是5MINS，你看差別多大。

當初在環球影城與LEGOLAND之間2選1，覺得LEGOLAND應該比較適合細少少的LITTLE L，結果都算無選錯，雖然LEGOLAND入面都係好多遊戲未玩得，不過佢淨睇下園內四處D LEGO公仔都開心到暈，男孩子必去，唯一係太熱，比較辛苦。

 

旁邊有間LEGO酒店，不過好多網友話不值得住，而且後來先知LEGOLAND附近地區治安唔好，我們唔知就唔識驚，好彩只係遊完LEGOLAND就走。另外，諗住LEGOLAND可能有D特別版LEGO買下，點知全部都係香港玩具反斗城有的，所以LITTLE L空手而回。我買左個雪條模$80，返香港見代購賣$200以上，覺得抵晒，哈哈。

 

LEGO酒店：

 

網上圖片：

 

DAY 4: CHINATOWN亞坤>新加坡動物園>RIVER SAFARI>文華酒店CHATTERBOX海南雞飯

BABA好鍾意食咖央多，見旅遊書話亞坤祖店在CHINATOWN，所以依住指示前往尋找，點知搬左，又依門口指示再搵，終於找到。而亞坤的咖央多和奶茶，又的確比其他好食少少。

 

當年去新加坡是夜遊動物園，不過印象中咩都睇唔到，因為太黑，哈哈。加上動物園位處的地方不算方便，回酒店很夜，所以今次一家大細就遊日間的新加坡動物園，再遊埋隔離個RIVER SAFARI。帶埋小朋友，動物園相當值得去，天宇的門票還包了兩個園內要額外收費的車和船票和一餐LUNCH，都算唔錯。

 

夜晚本來想食海鮮，不過身上現鈔不多，不肯定那些大排檔形式的海鮮檔是否收咭，又想食好D，所以去了文華酒店CHATTERBOX食傳說中新加坡最貴的海南雞飯。6299和我點了海南雞飯，BABA則點了喇沙，LITTLE L點了兒童餐，味道的確不錯。

 

DAY 5: 酒店泳池>CHINATOWN買手信>機場

酒店細細地，但都想去泳池玩下，市中心酒店的泳池的確不能和聖陶沙的酒店相比。玩了一陣水，居然一陣過雲大雨，立刻回房沖涼更衣。

 

SHOW下我頂靚帽：

 

然後去CHINATOWN買手信，當然少不了胡振隆和林志源的肉乾、馮滿記的「千里追風油」。個人認為林志源的肉乾好食D，但BABA則支持胡振隆的肉乾。

 

回程飛機遲了半小時起飛，LITTLE L午睡時間，起飛即瞓，瞓了差不多2小時，食埋個飛機餐，睇一陣電視剛好落機，非常乖!

後記：

其實新加坡好熱，不過都算方便和乾淨，又多適合小朋友的景點，我們還有很多景點未去，算是適合親子遊的地點。我們算幾好彩，除了最後一日早上有場過雲雨，日日天朗氣清，之後回來睇番網友講，後來幾個星期都差不多日日暴雨，非常掃興，我們非常感恩出門都有好天氣。